Notas de prensa

Investigadores da USC estudan reovirus aviares como axentes antitumorais para humanos

O grupo de investigación Viroloxía Molecular e Estrutural, dirixido
polo catedrático Francisco Javier Benavente e o profesor José Manuel
Martínez Costas, realiza a caracterización molecular dos reovirus
aviares para crear vacinas contra a artrite e problemas de absorción
dos alimentos nas aves. Non obstante, “as achegas non rematan aquí”,
apunta Benavente, que resalta que os mesmos virus son “posibles
axentes anticancro”.

O catedrático lembra que outros grupos de investigación demostraron as
propiedades antitumorais dos seus homólogos de mamífero e xa se están
realizando ensaios preclínicos. “Semella que ambos virus destrúen as
células canceríxenas sen afectar ao resto do organismo”, explica o
responsable do proxecto.

No futuro, as achegas poderán dar lugar á creación de vacinas para
tratar o cancro en seres humanos, “o que sería útil na loita contra
esta doenza”, comenta Benavente.

Este traballo de investigación básica céntrase na caracterización
biolóxica do reovirus aviar para coñecer a súa estrutura, composición
dos xenes e proteínas xunto coas alteracións que induce nas células
infectadas. O estudo é relevante pois, como o catedrático indica,
“enfermidades como a artrite afectan ás aves e, por conseguinte,
causan grandes perdas económicas na industria avícola”.

Descubrimentos patentados

O grupo tamén está a patentar un sistema para detectar as interaccións
entre proteínas no interior da célula baseado na expresión dunha delas
do reovirus aviar. Tratase dun sistema moi simple e de baixo custe,
polo que pode ser una boa alternativa a outros métodos que se utilizan
na actualidade.

Sobre a data de remate da investigación, Benavente subliña que “o
estudo dun virus nunca se acaba porque canto máis descobres, máis
cuestións interesantes xorden por resolver”.