Notas de prensa

O Consorcio Audiovisual recolle o VI Premio Ciudad de San Sebastián Film Commission

O director xerente do Consorcio Audiovisual de Galicia, Nacho Varela, en representación do presidente do organismo, Fernando Salgado, foi o encargado de recoller en San Sebastián o VI Premio Ciudad de San Sebastián Film Commission concedido ao filme galego Pradolongo. No acto, que se desenvolveu nos Cines Príncipe, estivo acompañado polo director do mesmo, Ignacio Vilar.

Fernando Salgado felicitou á produtora galega Via Láctea Filmes porque a súa película Pradolongo se alzase co Premio Ciudad de San Sebastián Film Comission, logo de que o Consorcio o propuxese para a elección, xunto con outros dous proxectos galegos. Ademais do premio en metálico, Pradolongo foi proxectado na sección Made in Spain do Festival Internacional de Cine de San Sebastián, unha das mellores plataformas de promoción internacional para o audiovisual galego.

O galardón outorgado á produtora galega vén a confirmar o traballo levado acabo polo Consorcio Audiovisual de Galicia a través da Galicia Film Comission co fin de dar a coñecer a comunidade como plató de cine.

A Galicia Film Commission é a oficina de promoción exterior integrada dentro do Consorcio Audiovisual de Galicia. Os seus obxectivos esenciais son dous: promocionar Galicia como espazo competitivo, idóneo para o desenvolvemento de proxectos empresariais no campo audiovisual e servir de imaxe institucional para as accións de promoción exterior do Consorcio. A Galicia Film Commission representa a Galicia nas principais feiras e misións comerciais internacionais do audiovisual, ao tempo que actúa como referencia na política informativa do audiovisual galego cara ao exterior. Así mesmo, traballa no impulso dunha liña informativa dirixida ao sector galego sobre aspectos relacionados coa comercialización internacional.

Seminario Modelos de organización y funcionamiento de los medios de comunicación públicos en la sociedad de la información

O secretario xeral de Comunicación, Fernando Salgado, clausurou en Aciveiro o seminario Modelos de organización y funcionamiento de los medios de comunicación públicos en la sociedad de la información, dirixido polo catedrático da Universidade de Santiago de Compostela Xosé López. Na súa intervención, salientou que os medios de comunicación “deben erixirse en dique contención da uniformidade cultural”. “A televisión pública debe ser o Asterix que resista ao imperio que homoxeneíza e empobrece culturalmente”, engadiu.

O curso, clausurado en Forcarei, celébrase no marco dos encontros organizados pola Universidade Internacional Menéndez Pelayo (UIMP). No seu relatorio, o secretario xeral de Comunicación expuxo os retos aos que hai que dar resposta de cara a establecer un modelo de organización e funcionamento dos medios de comunicación públicos enfocado cara a sociedade de información. Así, explicou que “os medios públicos deben estar ao servizo da cidadanía e non do negocio”.

Entre os retos cos que se atopan os medios públicos, Fernando Salgado referiuse á integración e rendabilización das tecnoloxías da información, o mantemento e reforzo do papel de servizo á cidadanía, o firme compromiso co coñecemento e a sociedade da información, a responsabilidade informativa e a necesidade de profesionalidade dos comunicadores.

No seu relatorio, Fernando Salgado destacou que despois de preto de 25 anos de vida da televisión pública galega, o Executivo autonómico mantén o compromiso de colocar á TVG no século XXI. “A televisión pública galega está nun marco radicalmente distinto ao contexto no que naceu”, remarcou.

Neste sentido, recordou a recente creación por iniciativa da Secretaría Xeral de Comunicación do grupo de traballo que ten por obxectivo elaborar unha serie de propostas e recomendacións sobre o papel, a estrutura e o funcionamento dos medios públicos audiovisuais de Galicia. As achegas, explicou, servirán de base para a elaboración do anteproxecto de reforma da Lei de Creación da CRTVG, que o Goberno se comprometeu a presentar neste semestre.