Notas de prensa

Pérez, o ratiño dos teus soños II, Campo Cerezo e El vestido, seleccionados polo Fondo Raíces 2007

A reunión anual do Fondo Raíces celebrada en San Sebastián decidiu os tres filmes subvencionados polo Programa Raíces na edición deste ano. Os elixidos foron Pérez, o ratiño dos teus soños II, Campo Cerezo e El vestido. Os participantes na mesma avanzaron ademais a posibilidade de que en vindeiras datas se incorpore un cuarto proxecto. O vicepresidente primeiro do Consorcio Audiovisual de Galicia e director xeral de Comunicación Audiovisual, Manuel José Fernández Iglesias, e o director xerente, Nacho Varela, participaron na reunión do fondo, un programa de coprodución audiovisual con asistencia galega, catalana, arxentina e andaluza.

O director xerente do Consorcio Audiovisual de Galicia, Nacho Varela, destacou a boa acollida do proxecto no marco do Festival de San Sebastián que se consolida como unha ponte entre a nosa realidade cinematográfica e o audiovisual latinoamericano, representado no programa Raíces polo prestixioso cine arxentino.
Na reunión celebrada déronse a coñecer as novas accións do Fondo Raíces para o vindeiro ano. Ademais aprobouse axudar na cooperación de tres novas películas subvencionadas polo Programa Raíces, encamiñado a estimular a coprodución entre os territorios e potenciar a internacionalización das súas respectivas industrias audiovisuais. Os films que este ano serán subvencionados son Pérez, o ratiño dos teus soños II, da produtora galega Filmax Animación, a catalá Castelao Productions, e a arxentina Patagonik Film Group; Campo Cerezo, da produtora arxentina Patricia Dora Martín García, a andaluza Artimagen Producciones SL, e a galega Saga TV, e El Vestido, da produtora arxentina Cooperativa de Trabajo Kaos, a catalá Nadir Films, e a galega Ardora Filmes SL.

Na reunión do programa Raíces acordouse ademais a rotación da presidencia do Foro que pasa a recaer en Andalucía. O Consorcio ten previsto que ademais se incorporen ao Fondo novos países cos que está a manter contacto e cuxas negociacións están practicamente ultimadas. Un dos filmes subvencionados o pasado ano El niño de barro de Adivina Producións ten participado en numeroso festivais internacionais e conseguiu un grande éxito de crítica e público. Así mesmo, outras das películas subvencionadas como Abrígate e A velocidade funda o esquecemento van ser estreadas nos próximos meses, a primeira delas a principios de ano e, a segunda, este outono.

Fondo Raíces

Galicia a través do Consorcio compón xunto con Cataluña, Arxentina e Andalucía o núcleo fundacional do Fondo Raíces, que ten como misión fomentar a coprodución entre as áreas xeográficas integrantes. O Fondo Raíces constitúe o único organismo promovido desde Galicia e dedicado ao ámbito da coprodución internacional.

O 21 de xaneiro de 2005 asinouse o Acordo Raíces entre o Consorcio Audiovisual de Galicia, o Institu Català de les Indústries Culturals (ICIC) e o Instituto Nacional de Cine y Artes Audiovisuales (INCAA) de Arxentina, a través do que se creou un fondo económico destinado a financiar axudas a produtoras independentes de Galicia, Cataluña e Arxentina que coproduzan longametraxes cinematográficas. O pasado ano 2006 asinouse unha addenda pola que a Junta de Andalucía, a través da Empresa Pública de Gestión de Programas Culturales, dependentes da Dirección General de Fomento y Promoción Cultural da Consejería de Cultura, participa tamén neste fondo específico para a produción cinematográfica.

Novidades na convocatoria deste ano

A terceira convocatoria de axudas a produtoras independentes de Galicia que se financiarán con cargo ao Acordo Raíces foi publicada no Diario Oficial de Galicia o pasado 4 de xullo. Nesta terceira convocatoria o importe máximo de axudas previstas polo Consorcio é de 150.000 euros, 75.000 imputados aos orzamentos do 2007 e 75.000 aos do 2008. O importe máximo subvencionable por proxecto é de 50.000 do orzamento galego que se completarán cun importe similar dos outros dous territorios participantes en cada proxecto, acadando 150.000 euros cada unha das producións subvencionadas.

Con respecto á anterior convocatoria as principais novidades son, a incorporación de Andalucía e, que as producións subvencionabas deberán ser coproducións internacionais hispano-arxentinas nas cales participen, como mínimo, tres empresas produtoras dos catro territorios asinantes do Acordo Raíces.

A valoración das solicitudes correu a cargo dunha comisión formada por membros das catro institucións do Fondo Raíces e baseouse, entre outros, nos criterios cualitativos do proxecto (orixinalidade e interese do argumento, estrutura do guión e calidade dos diálogos e da narración, trato visual, historial do equipo técnico e do equipo artístico) e nos criterios industriais (historial da produtora solicitante, das empresas coprodutoras e dos produtores executivos, financiamento, plan de lanzamento, análise e previsión dos ingresos, adecuación e coherencia do orzamento ao proxecto presentado).

No referente ao sistema de pagamento, o primeiro do 50% realizarase no momento da concesión, sempre que se cumpran os requisitos establecidos na convocatoria; un 30% da axuda ao inicio da rodaxe (que deberá ter lugar antes do 31 de marzo de 2008) e un terceiro e último pago do 20% restante á entrega dos materiais. Con esta medida preténdese favorecer ás productoras beneficiarias xa que disporán do 80% do importe da subvención ao inicio da rodaxe.

Con esta actividade, o Consorcio Audiovisual de Galicia continúa afianzando o Plan de Internacionalización do Audiovisual Galego e recollendo todo tipo de promoción no exterior do produto e da industria audiovisual galega.

Happy Hour Galicia Terra de Cine

Tras a reunión, o Consorcio Audiovisual de Galicia celebrou a Happy Hour Galicia Terra de Cine onde presentou os II Encontros co cine galego. Fíxose a través dun acto lúdico para promover o audiovisual galego no marco do Festival de San Sebastián.

Ao mesmo asistiron Nacho Varela, director-xerente do Consorcio Audiovisual de Galicia e Manuel José Fernández Iglesias, vicepresidente primeiro do Consorcio. Cómpre destacar a participación a través dun vídeo do cineasta José Luis Cuerda. Entre a ampla representación de asistentes atopábanse ademais numerosos medios acreditados consecuencia dos Encontros Galicia Terra de Cine, celebrados en Santiago o pasado ano.

A presentación do acto correu a cargo dos actores galegos María Castro e Manuel Lozano. Os encargados da ambientación musical foron Chuchus Pimentel e Delio Domínguez. Esta actividade recolleu unha semblanza histórica da actividade cinematográfica de Galicia, así como a presentación aos asistentes de Galicia Terra de Cine e o Fondo Raíces.

Durante a Happy Hour o Consorcio Audiovisual de Galicia anunciou que a segunda edición de Galicia Terra de Cine vaise celebrar en Santiago os días 15, 16 e 17 de novembro. Nela participarán máis de 40 producións das que se poderá recibir información no encontro.

Dentro da presenza galega no Festival, hoxe preséntase na sección oficial o filme Siete mesas de billar francés dirixida por Gracia Querejeta e rodada en Galicia, na cidade de Vigo. A súa actriz protagonista, Maribel Verdú rodou recentemente El niño de barro e na actualidade grava en Ourense o último filme de José Luis Cuerda, Los girasoles ciegos.