Galicia solicitará o traspaso dos medios materiais e persoais para xestionar a súa costa tralo aval do Tribunal Constitucional
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
A representante do Executivo galego destacou que a resolución xudicial deixa claro que o recurso do Goberno central contra a lei foi máis político que xurídico e que a paralización da normativa responde á diferenza de trato con outras comunidades. De feito, lembrou que a Galicia non se lle deu opción a negociar mentres que a Cataluña e a Baleares se lle recoñeceron como constitucionais os artigos recorridos na lei galega.
Neste sentido, Ángeles Vázquez censurou a actuación do Executivo central dando privilexios a unhas comunidades sobre outras -cando deberían ser todas iguais ante a lei- e a inquedanza innecesaria que xeraron as súas decisións no conxunto da cadea mar-industria e de toda a cidadanía.
Unha pena que se tivese que chegar a este extremo e que quedara tan de manifesto esa diferenza de trato con outras comunidades, aseverou a conselleira de Medio Ambiente e Cambio Climático, que asegurou que a Xunta vai seguir traballando na defensa dos intereses de Galicia, máis aló de intereses partidistas, como fixo desde o principio.
Neste sentido, incidiu en que o Executivo galego non mudou de posición en ningún momento, cousa que si fixeron os socialistas galegos, que inicialmente apoiaban a lei e despois se abstiveron na votación.
Seguridade xurídica
A responsable autonómica felicitouse por unha resolución do Tribunal Constitucional que é unha gran nova para Galicia e para todos os galegos ao dar garantías ás arredor de 1,5 millóns de persoas que viven no litoral e ás empresas que desenvolven a súa actividade económica nel. Supón avalar a xestión por parte da comunidade dos seus máis de 2.500 quilómetros de costa e dar seguridade xurídica a un complexo mar-industria que dá emprego a arredor de 40.000 persoas e xera unha actividade económica de 9.000 millóns de euros anuais, preto do 5% do PIB de Galicia.
Ángeles Vázquez tamén salientou que a sentenza xudicial certifica que, como defendeu Galicia, a lei non vai contra ninguén, defende os intereses lexítimos de Galicia no marco das competencias que lle atribúe o Estatuto de Autonomía desde unha tripla perspectiva ambiental, social e económica.
R., 2024-04-24
Actualidad
O 97% das zonas rexistradas no censo de augas de baño de Galicia conta cunha clasificación sanitaria de excelente ou boa. Así se recolle no informe final sobre o Programa de vixilancia sanitaria das zonas de baño 2023 elaborado pola Dirección Xeral de Saúde Pública da Consellería de Sanidade presentado hoxe no Consello da Xunta. O Goberno galego iniciará o vindeiro 1 de xuño unha nova campaña do Programa de vixilancia, tomando como referencia o informe final da pasada tempada. Na pasada tempada, e con motivo da entrada en vigor do Decreto 175/2022, do 13 de outubro, sobre vixilancia sanitaria das augas de baño de Galicia, a Xunta fixo públicas as augas de baño que pasan a formar parte do novo Rexistro de Augas de Baño de Galicia, ben na sección I (augas de baño incluídas no Censo de zonas de augas de baño, na sección II (augas de baño en avaliación) ou na sección III (augas con prohibición permanente do baño).
A escritora Arantza Portabales recibiu o premio Clubs de Lectura 2024, por ser a autora galega máis lida nas bibliotecas escolares durante o curso. A entrega deste premio enmárcase na XVI Xornada de Clubs de Lectura, que congregou a máis de 400 coordinadores destes espazos educativos co obxectivo de compartir experiencias e afondar en novas accións sobre o libro e a lectura. As bibliotecas escolares galegas destacan pola calidade dos espazos de aprendizaxe, polas as actividades relacionadas co tratamento da información e competencias dixitais ou pola formación en diversidade e igualdade.
Notas
O cancro anaplásico de tiroide, un dos máis agresivos e devastadores, actualmente ofrece poucas opcións de tratamento efectivas, cunha taxa de supervivencia de cinco anos de apenas o 5%. Non obstante, un novo estudo abre a porta cara a unha terapia innovadora. A investigación foi realizada por persoal investigador do Centro de Investigación en Medicina Molecular (CIMUS) e do Complexo Hospitalario Universitario de Santiago (CHUS), ambos os dous pertencentes á USC e ao Instituto de Investigación Sanitaria Galicia (IDIS).
A Escola Técnica Superior de Arquitectura (ETSAC) da Universidade da Coruña acolle o 'I Foro Transnacional. Arquitecturas do Mar e a súa Paisaxe Asociada', que supón o lanzamento do proxecto europeo SEALabHaus, no que arquitectos galegos e doutras rexións do arco atlántico español peninsular presentarán boas prácticas de rehabilitación, adecuación e intervencións, tanto en construcións litorais como na paisaxe asociada a elas.